Перед началом всякого дела

Царю́ Небе́сный, Уте́шителю, Ду́ше Истины, Иже везде́ сы́й и вся́ исполня́й, Сокро́вище Благи́х и Жи́зни Пода́телю, прииди́ и всели́ся в ны́, и очи́сти ны́ от вся́кия скве́рны, и спаси́, Бла́же, ду́ши на́ша.

Тропарь, Глас 4:

Тво́рче и Созда́телю вся́ческих, Бо́же, де́ла ру́к на́ших, к Сла́ве Твое́й начина́емая, Твои́м Благослове́нием спе́шно испра́ви, и на́с от вся́каго зла́ изба́ви, я́ко Еди́н Всеси́лен и Человеколю́бец.

Кондак, Глас 3:

Ско́рый в заступле́ние и Кре́пкий в по́мощь, предста́ни Благода́тию Си́лы Твоея́ ны́не, и благослови́в укрепи́, и в соверше́ние наме́рения блага́го дела́ рабо́в Твои́х произведи́; вся́ бо ели́ка хо́щеши, я́ко Си́льный Бо́г, твори́ти мо́жеши.

Го́споди Иису́се Христе́, Сы́не Единоро́дный Безнача́льнаго Твоего́ Отца́, Ты́ ре́кл еси́ Пречи́стыми Усты́ Твои́ми: бе́з Мене́ не мо́жете твори́ти ничесо́же. Го́споди мо́й, Го́споди, ве́рою объе́м в души́ мое́й и се́рдце Тобо́ю рече́нная, припа́даю Твое́й Бла́гости; помози́ ми́ гре́шному сие́ де́ло, мно́ю начина́емо, о Тебе́ Саме́м соверши́ти, во Имя Отца́, и Сы́на, и Свята́го Ду́ха. Ами́нь.

Го́споди! Иису́се Христе́, Сы́не и Сло́ве Бо́жий, ра́ди Имени Твоего́ Свята́го, Си́лою Животворя́щего Креста́, моли́тв Пречи́стыя Твоея́ Ма́тре, Небе́сных Си́л Безпло́тных и все́х Твои́х Святы́х, благослови́ тру́д мо́й, да́бы о́н бы́л в прославле́ние Имени Твоего́, в спасе́ние души́ мое́й, в по́мощь и наставле́ние бли́жнему моему́. Ами́нь.